الثلاثاء، 6 يوليو 2010

هو وهي 1

هو وهي خاطرة من الحياة ،قد تكون حياتي وقد تكون حياة اخري،لكنها تظل خاطرة من قلب القاهرة.

المكان: اتصال موبايل
الزمان: الساعة 3ونص الصبح
هي عمالة ترغي وتعيد وتزيد وتتلكم في 5 مواضيع في وقت واحد،وهو بيحاول يجري ورا الكلام ويفهم ويقاوم النوم اللي بيهاجمه بشراسة
هي :هي بقي قالتله ان كدا ما ينفعش،ازاي يمسك موبايلها ويقلب فيه ويمسح نمر علي مزاجه ، انت ايه رايك؟
هو:هي مين؟
هي: يووووووه انت مش مركز معايا،هي صاحبتي وهو صاحبها
هو:اااااااه ،لا طبعا مايصحش
هي: مش كدا والنبي،دا انا حتي حكيت لماما قالتلي انه كدا عبط واستنطاع،وقالتلي اقولها تعمل زي بنت خالتي.
هو:امممممم
هي:امممممم ايه؟ انت عارف هي عملت ايه
هو :هه
هي(والشرر يتطاير من حنجرتها):انت مش مركز معايا ولا ايه
هو :انا مركز اهه هي عملت ايه بقي؟
هي:انت عايز تنام؟
هو :لا
هي:بجد انت عايز تنام؟
هو :لا يا بنتي مش عايز انام.
هي :خلاص روح نام ونكمل بعدين (كلمات تقطر قرف وسخط)
هو:تصبحي علي خير.
هي:وانت من اهله يا خويا !!!!
انقطاع الاتصال والسقوط في نوم عميق وغضب عميق.

هناك تعليق واحد:

  1. أمور تحدث كل يوم
    بس أنت مزاجك عالى قوى فى المواضيع إلى بتختارها

    موضوع شيق


    أنتظر مرورك للتواصل

    كاتب مصرى

    ردحذف

شاركنا برأيك فيما قرأت
وشكرا